Tre pjesëtarë të opozitës në parlamentin e Venezuelës kanë kërkuar strehim në ambasadat e huaja, pasi kanë humbur imunitetin e tyre kongresional.

Ata kanë qenë në mesin e 10 ligjvënësve, të cilëve u është hequr imuniteti, pasi Gjykata Supreme ka thënë se ata duhet të hetohen për konspiracion, rebelim dhe tradhti.

Opozita e udhëhequr nga Juan Guaido ka tentuar të nisë rebelim ushtarak kundër presidentit të kontestuar, Nicolas Maduro javën e kaluar.

Ai e ka shpallur veten president të përkohshëm në muajin janar, duke konsideruar se mandati i ri i Maduros është i jashtëligjshëm.

Legjitimiteti i tij është njohur nga 50 kombe, duke përfshirë Shtetet e Bashkuara dhe pjesën më të madhe të vendeve të Amerikës Latine, derisa Maduro vazhdon të ketë mbështetjen e Kinës dhe Rusisë.

Ministria e Jashtme e Italisë ka njoftuar se në ambasadën e këtij shteti është strehuar njëri nga deputetët derisa tjetri gjendet në ambasadën e Spanjës.

Situata në Venezuelë është përshkallëzuar prej kur Guaido e ka shpallur veten president të përkohshëm dhe ka mbajtur një varg protestash në rrugë.

Ai ka thënë për BBC-në së fundmi se nuk e përjashton mundësinë që t’i kërkojë ndihmë ushtarake SHBA-së për të intervenuar në këtë shtet.

Maduro në anën tjetër është kritikuar vazhdimisht për shkak të inflacionit të lartë dhe pretendimeve për abuzim me të drejta të njeriut.